الكاتب الصحفي محمد عبدالجليل يكتب : يا مباحث القاهرة الحقونا.. احنا اتنصب علينا!

بعد صلاة التراويح وذهابي إلى البيت وجدت تليفوني عليه أكثر من 15 اتصال فائت.. خير يا رب.. فيه إيه!

المكالمات كانت من زميلة صحفية تواصلت معها فقالت لي وهى منهارة من البكاء:

– انت فين؟ أنا اتنصب عليا أنا وأمي ولازم تيجي معايا القسم.
– ⁠في رمضان كده! ده لسه أول أسبوع!
– كنت عايزة أسافر عمرة أنا وأمي، وقرأت على النت إعلان عن شركة اسمها مناسك المجد، في جسر السويس بتنظم رحلات عمرة، كلمتهم ودفعت لهم 85 ألف جنيه واستلمت التأشيرتين وتذكرتين سفر وحضَّرنا الشنط وشغلنا الأغاني “يا رايحين للنبي الغالي هنيا لكم وعقبى لي”، وإخواتي وقرايبي والمنطقة كلها فرحانة وبتغني.
– وبعدين؟
– وأغنية “رايحة فين يا حاجة يا أم شال قطيفة”.
– هو ده وقت أغاني؟ خلصي.. وبعدين؟
– ⁠ اكتشفت من خلال الناس اللي مسافرة معانا وعددهم 80 معتمر إن صاحب الشركة اغلق المكان المستأجر في 108 شارع جسر السويس ميدان الف مسكن الدور الرابع، واستولى على الفلوس وهرب والتذاكر مزورة.. أعمل إيه وأمي ما تعرفش لغاية دلوقتي!
– ⁠سيبك من أمك دلوقتي وشغلي لها أغنية “خدوني معاكم يا رايحين الحرم، وابعتي لي بيانات الشركة وكل الأوراق.

اتصلت بمكتب مساعد وزير الداخلية مدير أمن القاهرة الذي طلب مني إرسال البيانات والأوراق وأرقام المجني عليهم، وأخبرني أنهم لا بد أن يحرروا محضرًا في قسم شرطة عين شمس، وبالفعل تم عمل المحضر تحت رقم 5132 وتواصلت مباحث الأموال العامة مع الضحايا وعرضوا عليهم بعض الصور المشتبه فيهم، وتكوَّن فريق بحث تابعه وأشرف عليه مدير الإدارة العامة للمباحث، وخلال 24 ساعة اتصل بي مكتب مدير الأمن يخبرني بالقبض على المتهمين، واتضح أنهم عصابة مكونة من 4 أفراد، زعيمهم اسمه محمود.ف. أ ..أنشأوا صفحة على موقع التواصل الاجتماعي لتقديم خدمات العمرة، واستغلوا أحلام المشتاقين لزيارة بيت الله والسلام على الحبيب صلى الله عليه وسلم، وكانت أسعارهم مغرية لاستقطاب أكبر عدد من الضحايا!

إنها حكاية مكررة، ومع ذلك فإن. الناس لا يتعظون!

يا جماعة الخير، قبل أن تذهبوا إلى أي شركة اتصلوا بوزارة السياحة للتأكد منها، هذه خطوة بسيطة وضرورية، كي لا تخسروا أموالكم وتقعوا ضحايا النصابين وتشغلوا أغنية “رايحة فين يا حاجة يا أم شال قطيفة” على الفاضي..
تحية من القلب للسيد مدير أمن القاهرة.. ولرجال المباحث .